SINOPSIS KETOPRAK KRIDA CARITA “KEMELUT MAJAPAHIT NAMBI MBALELO”

Kelir 1 - Gunung Lawu

Dipuncariyosaken menawi Anungraga kaliyan Kembang Sore kataman asmara. Kekalihipun menika sejatosipun murid wonten ing padhepokan Gunung Lawu. Wonten ing salah satunggiling dinten, kekalihipun katingal saweg adu kakiyatan wonten ing satengahing alas. Menika dipunlakokake sanes amargi memungsuhan, ananging Anungraga menika saweg nyobi kaprigelanipun Kembang Sore. Dumadakan Andhika Bhayangkara dhateng lan nyeret astanipun Kembang sore, lajeng Kembang Sore dipunasta peksa dening Andhika Bayangkara. Abdhika Bayangkara menika ngakoni bilih piyambakipun tresna kaliyan Kembang Sore. Ananging Kembang Sore nampik katresnan Andhika Bayangkara menika amargi tresnanipun Kembang Sore namung kagem Anungraga.

Anungraga murka lajeng piyambakipun adu kekiyatan kaliyan Andhika Bayangkara. Perang tandhing menika teras dipunpisah dening Ki Hajar Wungkuk, wonten ing mrika Ki Hajar Wungkuk paring pitedah-pitedah kagem kekalihipun. Salajengipun, Ki Hajar Wungkuk ngendhika menawi Ki Hajar Wungkuk boten paring palilah kagem katresnan Anungraga kaliyan Kembang Sore. Sasampunipun Ki Hajar Wungkuk paring pitedah menika, piyambakipun nyariyosaken nalika Anungraga lan Kembang Sore tasih alit wonten ing jaman samanten.

Kelir 2 - Kadipaten Tuban

            Wanci menika Adipati Ranggalawe saweg semedi. Prameswarinipun ingkang asma Dewi Mirtaraga kaliyan Dewi Tirtaningsih rawuh marang papan semedinipun Ranggalawe menika. Dewi Mirtaraga ngendhika menawi Dewi Tirtaningsih rumaos boten sekeco wonten ing penggalihipun. Menika amargi Dewi Tirtaningsih ngimpi yen Ranggalawe ical sesarengan kaliyan icalipun pedhut. Wonten ing ngimpinipun Dewi Tirtaningsih, piyambakipun saweg lenggahan wonten Taman Sari. Dumadakan wonten pedhut ingkang ngaling-alingi paningalanipun, boten dangu pedhut menika ical, ananging icalipun pedhut wau dipunsarengi kaliyan icalipun Adipati Ranggalawe. Adipati Ranggalawe mestekaken kaliyan prameswarinipun menawi ngimpi menika inggih namung kembang sare, boten anggadhahi teges sanes-sanesipun. Sanalika wekdal semanten lajeng wonten njawi keraton kapireng swantenipun Kebo Anabrang, panjenenganipun lajeng medal badhe adu kekiyatan kaliyan Kebo Anabrang wau. Saderengipun medal, Ranggalawe ngendhika menawi garwanipun kekalih menika kedah njagi lan ngreksa putra putrinipun.

Ranggalawe lan Kebo Anabrang perang tandhing. Sadaya prajurit tumpes wonten paperangan ageng menika. Kebo Anabrang nyobi nyilakani Ranggalawe, ananging Ranggalawe saged nangkis serangan menika. Ranggalawe ugi nyobi nyilakani kebo Anabrang, nalika kerisipun Ranggalawe sampun wonten sangajengipun padharanipun Kebo Anbrang, dumadakan wonten Ki Hajar Wungkuk ingkang nyobi nyegah perang tandhing kekalihipun. Nanging Ranggalawe dados lena lan menika kasempatan kangge Kebo Anabrang supados saged mejahi Ranggalawe. Pungkasanipun Ranggalawe gugur dening keris Kebo Anabrang menika. Salajengipun, Kebo Anabrang menika uga dipunpejahi dening Ken Sorah. Pungkasanipun, Ken Sorah ngendhika kaliyan kekalih prameswari, menawi anggadhahi pepenginan kangge nylametaken ingkang putra, kekalihipun kedah dhateng wonten ing Gunung Lawu.

Wonten Gunung Lawu menika, putranipun Dewi Mirtagra ingkang kakung dipungantos asmanipun dados Anungraga, menawi putrinipun Dewi Tirtaningsih dipunasmani Kembang Sore. Kekalih putra lan putri wau dipunajengaken supados saged dadosaken kamakmuran Kadipanten Tuban benjang. Dene Ken Sorah piyambak dipungantos asmane dados Ki Wungkuk. Sedayanipun sareng-sareng dhateng wonten Gunung Lawu.

Kelir 3 - Gunung Lawu

Mangertosi kahanan ingkang sanyatanipun. Anungraga lan Kembang Sore kaget sanget. Ananging kekalihipun nuli sadhar lan saged narima menawi sajatinipun kekalih menika inggih tasih sadherek. Ananging Kembang Sore boten narima menawi piyambakipun badhe kajodohaken kaliyan putra Ki Wungkuk inggih menika Andhika Bayangkara.

Anungraga kadhawuhaken supados nyerak Gunung Lawu kangge napak tilas tiyang sepuhipun. Panjenenganipun kedah nerasake lan merjuangaken ingkang Rama, inggih menika Ranggalawe ingkang sampun dados pahlawan wonten Tuban.

Kelir 4 - Kadipaten Lumajang

Adipati Harya Nambi. Inggih menika Adipati wonten Lumajang ingkang sanget ngayomi dhateng rakyatipun. Panjenenganipun tansah njagi Lumajang saking bebaya, mliginipun bebaya saking Majapahit. Wonten ing satunggiling dinten, Adipati Harya Nambi saweg ngendhikan kaliyan Patihipun, Ramapati rawuh wonten Kadipaten Lumajang. Ramapati ngraos bombong amargi Lumajang menika tansah makmur, boten benten kalih Majapahit, sadaya warganipun tansah bagya lan mulya.

Adipati Harya nambi badhe rawuh dhateng Majapahit, nanging dipunpenging kaliyan Ramapati. Ramapati ngedhikan kaliyan Adipati Harya Nambi menawi Jayanegara samenika sampun oten kados rumiyin malih. Ramapati uga ngendhika dhateng Adipati Harya Nambi, menawi Adipati Harya Nambi sampun boten dipunperlukake malih kaliyan Jayanegara. Mirengaken pitados saking Ramapati menika, Adipati Harya Nambi duka lajeng anggadhahi rencana kangge mbalelo dhateng Majapahit.

Kelir 5 - Majapahit

Kebo Taruna bilih Senopati Agung woten Majapahit, kanthi kapercayan mbela Majapahit tindhak Lumajang kangge numpes Haryo Nambi, Adipati Lumajang. Harya Nambi anggawe rencana kaliyan putrinipun, Endang Parmiati supados piyambakipun damel Kebo Taruna tresna kaliyan Endang Parmiati. Inggih dipunhasut ugi supados Kebo Taruna mbalik nyerang Majapahit. Saduginipun wonten Majapahit, Lembu Pangarsa boten narima menawi Kebo Taruna menika mberotak Majapahit. Nalika Lembu Pangarsa ngendhikan kaliyan Prabu Jayanegara, dhateng salah satunggiling putra ingkang angadhep Prabu Jayanegara nyanggupi piyambakipun numpes Kebo Taruna lan Adipati Harya Nambi. Putra menika inggih Anungraga ingkang sampun dipunutus dening Ki Ajar Wungkuk supados mbiyantu Kerajaan Majapahit. Sesarengan kaliyan Andhika Bayangkara, Anungraga ngalahake Kebo Taruna. Mangertosi Kebo Taruna pejah ing putra Kerato Majapahit, Adipati Harya Nambi nglawan pemuda kekalih wau, nanging pungkasanipun Adpati Harya Nambi uga saged dideta wonten sangajengipun Prabu Jayanegara.

Pungkasanipun, Adipati Harya Nambi lan Prabu Jayanegara mangertosi menawi sadaya prakara menika inggih hasutan saking Ramapati. Salajengipun, dipunmangertosi ugi menawi Anungraga menika Uda Anjangpiani putra Ranggalawe, Anungraga dipunpasrahi tahta lan dados Adipati Tuban, dene Andhika Bayangkara dipunpercaya dados Patih wonten Kerajaan Majapahit.